பிஸ்கட் பாக்கெட்டில் அஜித் படம்: 'AK Racing X Reliance' கூட்டணி!

ரிலையன்ஸ் - அஜித் குமார் ரேசிங் புதிய கூட்டணி

ரிலையன்ஸ் கன்சியூமர் பிராடக்ட்ஸ் நிறுவனம், பிரபல நடிகர் அஜித் குமாரின் 'அஜித் குமார் ரேசிங்' அணியுடன் இணைந்து புதிய பிராண்ட் கூட்டணியை அமைத்துள்ளது. இதன் மூலம் 'இண்டிபெண்டன்ஸ் பவர் அப்' (Independence Power Up) பிஸ்கட் விளம்பரப்படுத்தப்பட்டு தமிழகத்தில் விற்பனைக்கு வந்துள்ளது. இந்த பிஸ்கட் பாக்கெட்டுகளில் நடிகர் அஜித்தின் படம் மற்றும் அவரது ரேசிங் தொடர்பான பிராண்டிங் இடம்பெற்றுள்ளது ரசிகர்களிடையே பெரும் வரவேற்பைப் பெற்றுள்ளது.

பல்வேறு விலைகளில் பிஸ்கட் வகைகள்

பொதுமக்களின் தினசரி உபயோகத்திற்காக 9 விதமான சுவைகளில் (Flavours) ரூ.5 முதல் இந்த பிஸ்கட்டுகள் அறிமுகமாகியுள்ளன. பால், குளுக்கோஸ் உள்ளிட்டவற்றை கொண்டு தயாரிக்கப்பட்டுள்ள இந்த பிஸ்கட்டுகள், ரூ.5, ரூ.10 மற்றும் ரூ.40 முதல் ரூ.125 வரை என மொத்தம் 28 பாக்கெட் வகைகளில் அறிமுகப்படுத்தப்பட்டுள்ளதாக ரிலையன்ஸ் நிறுவனம் தகவல் தெரிவித்துள்ளது.

விற்பனை மற்றும் விநியோகம்

தமிழ்நாட்டை ஒரு முக்கிய விற்பனை சந்தையாக கருதும் ரிலையன்ஸ் நிறுவனம், உற்பத்தியை அதிகரித்து விநியோகத்தை தீவிரப்படுத்த திட்டமிட்டுள்ளது. பொதுக் கடைகள், சூப்பர் மார்க்கெட்டுகள், ஆன்லைன் தளங்கள், ரிலையன்ஸ் ஸ்டோர்கள் மற்றும் மொத்த விற்பனைக் கடைகளில் இந்த பிஸ்கட்டுகளை விற்பனை செய்ய அந்நிறுவனம் திட்டமிட்டுள்ளது.