கே.என்.நேரு தொடர்புடைய ரூ.634 கோடி முறைகேடு வழக்கு: எனக்கு எந்தவித தொடர்பும் இல்லை - நடிகை ஜனனி அசோக்குமார்

விகடன் மற்றும் சமூக வலைதளச் செய்திகளுக்கு மறுப்பு

அமைச்சர் கே.என்.நேரு தொடர்புடைய ரூ.634 கோடி முறைகேடு வழக்கில், முறைகேடாகப் பெறப்பட்ட பணத்தை வெள்ளையாக மாற்ற சின்னத்திரை நடிகைகள் பயன்படுத்தப்பட்டதாக சமூக வலைதளங்களில் செய்திகள் வெளியாகி வருகின்றன. இவற்றுடன் தன்னைத் தொடர்புபடுத்திச் செய்திகள் வெளியாகியுள்ளதைக் கண்டித்துள்ள சின்னத்திரை நடிகை ஜனனி அசோக்குமார், அதற்குத் தகுந்த விளக்கமளித்துள்ளார்.

அரசியலுக்கும் எனக்கும் எந்தத் தொடர்பும் இல்லை

இதுகுறித்து அவர் வெளியிட்டுள்ள விளக்கத்தில், தன்னைப்பற்றி பரப்பப்படும் தகவல்கள் முற்றிலும் உண்மைக்குப் புறம்பானவை என்று குறிப்பிட்டுள்ளார். தான் எப்போதும் அரசியலுக்கு அப்பாற்பட்டவள் என்றும், எந்த ஒரு அரசியல் கட்சியுடனும் தனக்குத் தொடர்பு இல்லை என்றும் அவர் தெளிவுபடுத்தியுள்ளார். மேலும், அரசியல்வாதிகளுடன் தனிப்பட்ட நட்பையும் தான் பேணியது இல்லை என்று திட்டவட்டமாகத் தெரிவித்தார்.

கடுமையான உழைப்பால் கிடைத்த நற்பெயர்

எந்த ஒரு பின்னணியும் ஆதரவும் இல்லாமல், திரைத்துறையில் நற்பெயரைப் பெற தான் கடுமையாக உழைத்துள்ளதாக ஜனனி அசோக்குமார் தெரிவித்துள்ளார். தன்னைத் தவறாகத் தொடர்புபடுத்திப் பதிவிடப்பட்ட பதிவுகளைத் திருத்த அல்லது நீக்க வேண்டும் என்று கோரியுள்ள அவர், உண்மை, தரவுகள் மற்றும் தனிமனிதனின் கண்ணியம் ஆகியவை மிக முக்கியமானவை என்று வலியுறுத்தியுள்ளார்.