வடகிழக்கு பருவமழை பாதுகாப்பு முன்னெச்சரிக்கைகள்: பொதுமக்களுக்கு மின்வாரியம் அறிவுறுத்தல்!

வடகிழக்கு பருவமழை மின் பாதுகாப்பு முன்னெச்சரிக்கைகள்

வடகிழக்கு பருவமழை தீவிரமடைந்து வரும் நிலையில், பொதுமக்கள் உயிர்ச்சேதம் மற்றும் மின் விபத்துகளைத் தவிர்க்கும் பொருட்டு பல முக்கிய பாதுகாப்பு முன்னெச்சரிக்கை நடவடிக்கைகளைக் கடைப்பிடிக்குமாறு தமிழ்நாடு மின்வாரியம் அறிவுறுத்தியுள்ளது.

தவிர்க்க வேண்டிய முக்கிய செயல்கள்

மின்கம்பங்கள், மின்மாற்றிகள் மற்றும் மின் பகிர்மானப் பெட்டிகள் அருகில் செல்வதைத் தவிர்க்க வேண்டும்; மேலும் அதன் அருகே தேங்கியுள்ள மழைநீரில் இறங்குவதைத் தவிர்க்க வேண்டும். தரையிலோ, சாலையிலோ அல்லது மழைநீரிலோ அறுந்து விழுந்த மின்கம்பிகளைத் தொடவோ, அகற்றுவோ கூடாது. இடி மற்றும் மின்னலின்போது திறந்தவெளி, தனித்த மரங்கள், மின்கம்பங்கள் மற்றும் மின்கம்பங்களின் கீழ் நிற்பதைத் தவிர்க்க வேண்டும். மின்கம்பங்களில் விழுந்த மரக்கிளைகளை வெட்டவோ அல்லது இழுத்து அகற்றவோ கூடாது. மின்கம்பங்களில் கால்நடைகளைக் கட்டுதல், துணிகளை உலர்த்துதல் மற்றும் விளம்பர பலகைகள் அமைப்பதைத் தவிர்க்க வேண்டும்.

அவசர உதவி மற்றும் புகார்கள்

வீடுகளில் மின் கசிவினால் ஏற்படும் விபத்துகளைத் தடுக்க RCCB (Residual Current Circuit Breaker) பொருத்த வேண்டும். மின்தடை, அறுந்த மின்கம்பிகள் மற்றும் மின் கசிவு தொடர்பான புகார்களுக்கு மின்னகத்தை அணுகலாம். பொதுமக்கள் எந்தவொரு அவசர உதவிக்கும் 94987 94987 என்ற எண்ணை அழைத்தோ அல்லது வாட்ஸ்அப் வாயிலாகவோ உடனடியாகத் தொடர்புகொள்ளலாம்.